Druknar i rocken
«Ein rock n’ roll-roman som gjer godt i hjertet» når aldri fram til dei rette strengene i eit kaos av referansar.
Mannen som gikk gjennom lydmuren er skrive av Arne Svingen, ein mann som etter kvart har gitt ut ein heil haug med barnebøker, og som er sjukt glad i gamal rock. No skriv han ein vaksenroman som har sin sjarm, men som blir avbrutt for ofte av ein overflod av rockereferansar og livsomveltande hendingar.
I kjernen er Birger Brunkeberg. Han har, i tillegg til eit artig namn, ein nær manisk fascinasjon for rockehistoria. Rocken og platesamlinga er også stort sett det han har i livet – heilt til han oppdagar at han har ein son på 17 år. Som òg er glad i rock. Det beste i boka er utviklinga mellom far og son, som også er hovuddelen av historia. Diverre kjem innslag frå blant anna ein ven i fengsel, ei gamal flamme, ein sur nabo, og alt for mykje rock, i vegen.
Rocken står sentralt i romanen, og blir brukt som eit bevisst grep – men det er synd at alle referansane til Nick Cave, Bruce Springsteen og Joni Mitchell endar med å bli irriterande oppstykking i det som i utgangspunktet er ei sjarmerande historie. I situasjonar der Brunkeberg kan gå gjennom litt frisk personleg utvikling, avbryter han det med å lista opp kva plater og låter som handlar om å ligga på sjukehus eller å køyra bil. Det blir rett og slett for mykje.
Rockereferansane er heller ikkje hovudproblemet i Mannen som gikk gjennom lydmuren. I den siste tredjedelen av boka skjer det alt for mykje. Brunkeberg blir kasta mellom situasjonar som avbryter kvarandre – han rømmer frå politiet, oppfyller rockedraumen, kjem nærare sonen og finn igjen gamal kjærleik i løpet av nokre få sider, og derfor rekk du ikkje å bli ordentleg investert i noko av det. Når det heile også blir hakka opp av nok ein rockereferanse, kjenner ein at denne romanen ikkje er verd tida.