Fysisk fostringsvatn

Aqua Fitness i regi av SiO Athletica var litt gøy, litt slapt og litt vanskeleg.

Publisert

Aqua Fitness

Trening

Av: SiO

Tid:* Måndagar, kl. 15.00-15.55

Stad: Domus Athletica

Tjuefire par hender som strekkjer seg mot taket, dei fleste ikledd ei slags syntetisk symjehud, er synet som møter meg idet eg entrar symjehallen på Domus Atletica. Det er tid for Aqua Fitness, og timen er fullteikna. Skepsisen grip tak i meg. Like fullt sluttar eg meg til flokken, og det går ikkje mange minuttane før eg kjenner at eg smiler medan eg rører meg opp og ned i vatnet. Eg twistar til Bobbysox og hitparaden har berre så vidt byrja. La det svinge!

«Ein skånsam og effektiv måte å trena uthald og styrke på», kallar SiO timen. Nja. Vatnet jobbar både med og mot meg. Rørslene vert ikkje slik som den energiske instruktøren på bassengkanten demonstrerer. Det er vanskeleg å jogga pulsen oppover når eg må venta på synka til bunns att mellom stega. Eg driv rundt som ein flodhest og kan ikkje fatta korleis alle rundt meg greier å halda seg i ro. Dei er openbert veteranar. Og ikkje berre veteranar i dette gamet, forresten, men i livet generelt. Snittalderen mellom deltakarane på Aqua Fitness må vera høgare enn nokon annan stad i SiO-systemet.

Utstyrsmessig gjeld det å stilla vel førebudd til timen. Den slitne H&M-bikinien; eg har plukka med meg held ikkje mål. Eg prisar meg lukkeleg for at eg er under vatn, står langt bak, og freistar halda aktivitetsnivået oppe medan eg kjempar mot ei stadig lengre rørleggarsprekke. Me kan godt gje oss, no. Eg vert bønhøyrd og det er tid for timens høgdepunkt: uttøying i det varme og herlege terapibassenget.

Aqua Fitness var litt gøy, litt slapt og litt vanskeleg. Idet det vart litt kjedeleg, var det over.

Powered by Labrador CMS