Lovar å te seg pent
Kandidatane vil ha ein sakleg og ryddig valgkamp. Fristen for å stille kandidatur til rektorvalet ved Universitet i Oslo gjekk ut måndag 16.februar klokka 16. Følgjande to kandidatar stillar til val:
– Det viktigaste er å møte kvarandre med verdigheit og respekt. Det vil vise seg at det er ein del ting vi er usamde om, elles ville det ikkje vore ein valkamp. Men det bør bli ein sakleg debatt, som universitetet tener på. Dei som følgjer valkampen bør få auge på ulike profilar og modellar for kva som er sentralt ved universitet, seier Trygve Wyller.
Han meiner det finst klare etiske grenser for korleis ein valkamp skal gå føre seg.
– Det er viktig at begge kandidatane snakkar om sin eigen profil, og prøver å tydeleggjera den på ein positiv og offensiv måte. Men eg trur grensa går ved å seia at den andre har eitt eller anna motiv for det han seier og meiner. Det synes eg er respektlaust, seier han.
TF-dekanen var også aktiv under førre valkamp, og seier han tek til seg det som har kome fram i omdømeundersøkinga. Han meiner det legg eit stort ansvar på dei som skal ut i elden no.
– Vi må unngå personkarakteristikkar. For universitetet si skuld må vi la det handle om visjonar for UiO si framtid, meiner han.
– Så dette blir ikkje ein ny valkamp med skitkasting?
– Nei, overhovudet ikkje.
Ole Petter Ottersen tenkjer heller ikkje akkurat å gå i strupen på sin motkandidat.
– Det har eg sagt frå fyste augeblikk. I eit tidligare intervju sa Wyller at plattforma mi er utydeleg. Da sa eg at eg ønskjer ein sakeleg diskusjon om kvart enkelt punkt. Vi har eigentleg sama mål, begge vil bruke vår tid og kompetanse på å gjere UiO enda betre. Derfor vil eg at vi skal sjå på kvarandre som medkandidatar, ikkje motkandidatar.
– Kan ikkje kandidatura bli utydelege om dykk skal vere så snille?
– Det er ei misforståing. Respekt kan pares med saklegheit og tydelegheit. Men sjølvsagt er det viktig å definere kvar vi er ueinige, elles blei valet eit spillfekteri. Eg vonar det går fram hoss vi vil vere forskjellige i måta vi profilerer universitetet. Foreløpig er det litt uklart for meg kvar vi vil vere mest forskjellige. Men dette vil komme fram i valkampen. Uansett, ingen tener på å vulgarisere valkampen.
Kandidatane
Namn: Trygve Wyller
Fødd: 4.juni 1950
Stilling: Dekan ved Det teologiske fakultetet frå 2007
Bakgrunn: Studiedekan ved Det teologiske fakultet 2003-2007
Medlem av Pressens faglige utvalg (PFU) 2000-2008
Professor i systematisk teologi og diakoniforskning frå 2000
Førsteamanuensis ved Det teologiske fakultet, UiO, 1996-2002
Dr. theol. 1994
Cand. theol. UiO 1982
Cand. mag. UiO (HF) 1976
Prorektor-kandidat: Guro Valen, medisinprofessor
Viserektor-kandidat: Arne Bugge Amundsen, instituttleiar ved Institutt for kulturstudium og orientalske språk (IKOS)
Frå den foreløpige plattforma:
- Auka ressursar til forsking
- Fleire post.doc.stillingar
- Leggje vekt på universell utforming
- Studentrekruttering i eit kulturelt mangfaldsperspektiv
- Øyremerka post.doc.-stillingar for kvinner
Namn: Ole Petter Ottersen
Fødd: 17.mars 1955
Stilling: Professor i medisin, avdeling for anatomi frå 1992
Direktør ved Centre for Molecular Biology and Neuroscience frå 2002
Bakgrunn: Forskingsdekan ved Det medisinske fakultet 2000-2002
Leiar for EMBIO (styringsgruppe for forsking innan molekylærbiologi, bioteknologi og bioinformatikk ved Universitetet i Oslo) 2001-2002
Førsteamanuensis ved Det medisinske fakultet: 1983-1992
M.D. UiO 1980
Ph.D. UiO 1982
Prorektorkandidat: Inga Bostad, viserektor ved UiO i dag
Viserektorkandidat: Doris Jorde, professor ved Utdanningsvitskapleg fakultet, Doris Jorde, og Ragnhild Hennum, professor ved Det juridiske fakultetet.
Frå den foreløpige plattforma:
- Meir tid til samanhengande forsking
- Vidareutvikle likestillingsarbeidet
- Styrke studierettleiing og fadderordninga
- Betre studiefinanseringa
- Styrke samarbeidet med Oslo by
