Frir til Studentenes Landsforbund

Under Norsk Studentunion (NSU) sitt landstingsmøte laurdag fekk ein det endelege ja-vedtaket med 74 mot åtte stemmer for samanslåing. Ingvild Reymert, avtrappande leiar i NSU, meiner at éin stor studentorganisasjon vil gje større truverd og større gjennomslagskraft enn to separate, når dei skal kjempe for auka løyvingar til høgre utdanning og studentvelferd.

– Vi vil kunne stå sterkare i den norske samfunnsdebatten når vi er samkjørte, meiner Reymert.

Entusiasmen når heilt til Stortinget.

– Dette er noko som kjem til å ende i historiebøkene. Eg får assosiasjonar til Berlinmuren sitt fall, seier Ine Marie Eriksen Søreide (Høyre), leiar i Stortingets kyrkje-, utdannings- og forskingskomité (KUF).

Tora Aasland, minister for forsking og høgre utdanning, er òg positiv til samanslåing, men meiner at det ikkje er ein garanti for betre gjennomslag hjå henne.

– Det treng ikkje ha med storleik å gjere. Det handlar om måten ein jobbar på.

Intern usemje i NSU

Fleire av NSU-representantane frå dei mindre institusjonane fryktar å miste påverknad når organisasjonen veks, då det kjem til å verte større konkurranse om posisjonar i sentrale verv og komitear. Fem av dei 15 representantane frå NSU-Bergen, og alle representantane frå lokallaget ved Handelshøgskulen i Bergen (NSU-NHHS), stemte mot samanslåinga.

– Sjølv om to parti er samde på nokre område, så vil ikkje det gjere at dei slår seg saman, seier Eirik Tennfjord frå NSU-NHHS.

Tennfjord meiner at det i prosessen har vore lite openheit rundt det å få fram kritiske røster. Reymert ser at samanslåinga kan oppfattast som problematisk.

– Det vil bli større forskjellar, men det er allereie ulikskapar internt i NSU. I ein større organisasjon vil alle medlemslag verte mindre, også dei store. Studentenes Landsforbund (StL) har god erfaring med mange små medlemslag, og vil kunne dra med seg desse erfaringane inn i den nye organisasjonen, seier Reymert.

Svar torsdag

Komande torsdag får ein det avgjerande vedtaket frå StL. Dersom svaret blir ja, skal den nye studentorganisasjonen, Ny nasjonal studentorganisasjon (NSO), etter planen ha sin første operative dag 1. juli 2010.

– Det har vore ibuande motsettingar mellom organisasjonane, og mellom meg og Ingvild (Reymert, journ.anm), som har gjort eit samarbeid vanskeleg. Men vi hatt ein open tone oss imellom som har gjort det lettare, seier Øistein Svelle, leiar i StL, som vonar at hans organisasjon også vil stemme ja til samanslåinga.

NSU har dei siste månedane fått mykje kritikk, blant anna på grunn av eit stort økonomisk underskot, og for utføringa av ei undersøking av partiprogramma sin utdanningspolitikk. Det gjenstår å sjå om StL let seg friste.